2020.10.10

今日好似著咗迷咁反複聽咗好多次《失明人杜煥憶往》，竟然想到自己試寫試唱一段，大概用咗三十分鐘寫詞，試唱咗十幾遍，然後用部手機錄咗兩遍，呢個係第二遍錄音，再用聲音軟件處理一下，加咗少少echo摹擬番現場收音嘅放果。放得出來，我已經完全不顧別人嘅竊笑。

「有個失明人，佢姓杜名煥呀，南音嘅詠唱，唱得感人。憑歌憶往，所憶何問呀，除了渠個人身世，仲有大半個世紀啲香江舊聞。滾滾呢紅塵，人就無根呀，今時憶往，都確係愁人。今時憶往，都確係愁人。」

正在想，或者可以用說唱嘅方式取代artist statement，好與作品並列，或者可以講，成為作品嘅一部分添，暫且名為「造山紀要」，展覽就叫作《造山紀》。「造山系列」同埋之前摸索階段嘅「山水系列」，約有十零件作品可以話見得吓人，來年確係ready可以做個展覽，但係場地真係依然未有頭緒，四壁白牆都唔係我想，庭院深深或者更加啱。

或者有人會問喇，咁你算係做「中媒」定「西媒」先，又算唔算係「當代藝術」呢。天呀，我好亂呀！無言以對，只好哈哈哈！